¹ Bongani uJehova, ngokuba muhle, ngokuba umusa wakhe umi phakade. ² Makathi u-Israyeli: Yebo, umusa wakhe umi phakade. ³ Mayithi indlu ka-Aroni: Yebo, umusa wakhe umi phakade. ⁴ Mabathi abamesabayo uJehova: Yebo, umusa wakhe umi phakade. ⁵ Engcingweni yami ngakh uleka kuJehova , uJehova wangiphendula endaweni ebanzi. ⁶ UJehova ungakimi, angiyikwesaba; umuntu angangenzani na? ⁷ UJehova ungakimi ekanye nabangisizayo; ngalokho ngiyakubabuka bephansi abangizondayo. ⁸ Kuhle ukuphephela kuJehova kunokwethemba umuntu. ⁹ Kuhle ukuphephela kuJehova kunokwethemba izikhulu. ¹⁰ Bonke abezizwe bayangizungeza; egameni likaJehova ngiyakubachitha. ¹¹ Bayangikaka, yebo, bayangizungeza; egameni likaJehova ngiyakubachitha. ¹² Bayangibunganyela njengezinyosi, bacimeka njengomlilo wameva; egameni likaJehova ngiyakubachitha. ¹³ Bayangihlohloloza ukuba ngiwe, kepha uJehova uyangisiza. ¹⁴ UJehova ungamandla ami nesihlabelelo sami, waba yinsindiso yami. ¹⁵ Izwi lokwethaba nelokusindiswa lisezindlini zabalungileyo ; esokunene sikaJehova senza okwamandla. ¹⁶ Esokunene sikaJehova siphakeme , esokunene sikaJehova sisebenza ngamandla. ¹⁷ Angiyikufa, kepha ngiyakuphila, ngishumayele imisebenzi kaJehova. ¹⁸ UJehova wangilaya nokungilaya, kodwa akanginikelanga ekufeni. ¹⁹ Ngivuleleni amasango okulunga, ngingene ngawo, ngimdumise uJehova. ²⁰ Yileli isango likaJehova; olungileyo uyakungena ngalo. ²¹ Ngiyakukudumisa, ngokuba ungizwile, waba yinsindiso yami. ²² Itshe abalinqabayo abakhi selaba yinhloko yegumbi. ²³ Lona lavela kuJehova; liyisimangaliso emehlweni ethu. ²⁴ Yilolu usuku alwenzileyo uJehova; siyakwethaba, sithokoze ngalo. ²⁵ Sindisa, Jehova! ngiyakuncenga; hlahlamelisa, Jehova! ngiyakucela. ²⁶ Makabusiswe ozayo egameni likaJehova; siyanibusisa sisendlini kaJehova. ²⁷ UJehova unguNkulunkulu, usikhanyisele; hlobisani umkhosi ngamahlamvu kuze kube sezimpondweni ze-altare. ²⁸ Wena unguNkulunkulu wami , ngiyakukubonga; Nkulunkulu wami , ngiyakukuphakamisa. ²⁹ Bongani uJehova, ngokuba muhle, ngokuba umusa wakhe umi phakade.