¹ Kwathi sesisindile khona, sezwa ukuthi isiqhingi sithiwa iMelitha. ² Abantu bakhona basiphatha ngobubele obungavamile, ngokuba babebasa umlilo, basamukela sonke ngenxa yemvula eyayisina nangenxa yamakhaza. ³ Kepha uPawulu ecakashile ixha lezinsaba , elibeka emlilweni , kwaphuma inyoka ngenxa yokushisa, yanamathela esandleni sakhe. ⁴ Abantu bakhona sebebona isilwane silenga esandleni sakhe , bakhuluma bodwa, bathi: Ngempela lo muntu ungumbulali othi noma esindile elwandle ukuLunga akuvumi ukuba aphile. ⁵ Kodwa yena wasinikinela isilwane emlilweni, akaze alimala. ⁶ Kepha babheka ukuthi usezakuvuvuka, nokuba awe phansi masinyane , afe. Kepha sebebheka isikhathi eside , bebona ukuthi akafikelwa ngozi , baphenduka bathi ungunkulunkulu. UPawulu uphilisa iziguli ⁷ Kwakukhona kuleyo ndawo izwe lesikhulu sesiqhingi , igama laso linguPhubiliyu; yena wasamukela, wasiphatha kahle izinsuku ezintathu. ⁸ Kepha uyise kaPhubiliyu wayelele phansi ephethwe ngumkhuhlane nembo ; uPawulu wangena kuye , wakhuleka, wabeka izandla phezu kwakhe , wamphilisa. ⁹ Kwathi lokho sekwenzekile , beza nabanye abasesiqhingini abanezifo , baphulukiswa, ¹⁰ basitusa ngokutusa okuningi ; kwathi mhla simuka ngomkhumbi , basinika esikudingayo. ¹¹ Emva kwezinyanga ezintathu sase simuka ngomkhumbi wase -Aleksandriya owawudlulisa ubusika esiqhingini, uphawu lwawo lungolwamaWele. ¹² Sangena eSirakhuse, sahlala izinsuku ezintathu; ¹³ sasuka lapho , sagwegwesa, safika eRegiyu. Sekudlule usuku lwaba lunye , kwavuka iningizimu, safika ePhutheyoli ngosuku lwesibili. UPawulu ufika eRoma ¹⁴ Safumana khona abazalwane , sancengwa ukuba sihlale nabo izinsuku eziyisikhombisa; kanjalo safika eRoma. ¹⁵ Abazalwame sebezwile ngathi basuka khona , beza ukusihlangabeza baze bafika e -Aphiyo Foru naseTresi Thaberne ; uPawulu ebabona wabonga uNkulunkulu, wema isibindi. ¹⁶ Sesifikile eRoma , uPawulu wavunyelwa ukuhlala yedwa enebutho elimlindayo. ¹⁷ Kwathi emva kwezinsuku ezintathu wabizela ndawonye kuye abakhulu babaJuda; sebebuthene, wathi kubo : Madoda, bazalwame, noma mina ngingenzanga lutho oluphambene nesizwe namasiko awobaba , nokho ngasuswa eJerusalema ngiyisiboshwa, nganikelwa ezandleni zamaRoma; ¹⁸ wona esengihlolile afuna ukungikhulula , ngokuba kungekho cala kimi lokuba ngife; ¹⁹ kepha abaJuda bekuphikisa , ngacindezelwa ukuba ngilidlulisele kuKesari , kungesikho ukuthi ngisimangalela isizwe sakithi ngalutho. ²⁰ Ngakho ngaleso sizathu nginibizele lapha ukuba nginibone , ngikhulume nani; ngokuba ngenxa yethemba lika-Israyeli ngiboshiwe ngaleli ketanga. ²¹ Base bethi kuye : Thina asamukelanga ncwadi ngawe evela eJudiya , akufikanga namuntu wabazalwane ukubika nokukhuluma utho olubi ngawe. ²² Kepha sithi kufanele sizwe kuwe okucabangayo , ngokuba siyazi ngaleli hlelo ukuthi liyaphikiswa ezindaweni zonke. ²³ Khona sebemmisele usuku beza kuye endlini yakhe bebaningi , wabachasisela efakaza ngombuso kaNkulunkulu , wabaqondisa ngoJesu ethathela emthethweni kaMose nakubaprofethi , kusukela ekuseni kwaze kwahlwa. ²⁴ Abanye baneliswa ngokwakhulunywayo, abanye abakholwanga; ²⁵ kwathi ukuba bangezwani bodwa , bamuka, uPawulu esekhuluma izwi labalinye lokuthi: Wakhuluma kahle uMoy a oNgcwele ngo -Isaya umprofethi koyihlo ²⁶ ngokuthi: Hamba uye kulesi sizwe , uthi: Ngokuzwa niyakuzwa, ningaze naqonda, nangokubona niyakubona, ningaze nabonisisa, ²⁷ ngokuba inhliziyo yalesi sizw e seyaba buthuntu ; bezwa kanzima ngezindlebe, amehlo abo bawacimezile, funa mhlawumbe babone ngamehlo , bezwe ngezindlebe, baqonde ngenhliziyo, baphenduke, ngibaphilise. ²⁸ Ngakho-ke makwazeke kini ukuthi le nsindiso kaNkulunkulu ithunyelwe kwabezizwe; bona-ke bayakuzwa. ²⁹ Kwathi eseshilo lokho , abaJuda baphuma ben okuphikisana okukhulu phakathi kwabo. ³⁰ Kepha uPawulu wahlala iminyaka emibili egcwele endlini yakhe ayiqashileyo, wamukela bonke abeza kuye, ³¹ washumayela umbuso kaNkulunkulu , wafundisa ngaso sonke isibindi izindaba zeNkosi uJesu Kristu, enganqatshelwa muntu.