¹ Kwathi emva kweminyaka eyishumi nane ngabuye ngenyukela eJerusalema kanye noBarnaba, ngithatha noThithu futhi. ² Kepha ngenyukela ngambulelwe; ngabalandisa ivangeli engilishumayela phakathi kwabezizwe , kepha phambi kwabadumileyo bebodwa , funa mhlawumbe kungaba ngukuthi ngigijimela ize, noma sengagijimela ize. ³ Kepha ngisho noThithu owayenami engumGreki kaphoqwanga ukuba asoke. ⁴ Kepha kwaba ngenxa yabazalwane bamanga abangeniswa ngasese, abangena ngokunyenya, bezakuhlola ukukhululeka kwethu esinakho kuKristu Jesu , ukuze basenze izigqila, ⁵ esingabahlehlelanga nasikhashana ngokubathobela , ukuze iqiniso levangeli lime njalo kinina. ⁶ Kepha kwabadumile ngokuthi bayinto -- nokuba babe yini , akulutho kimi; uNkulunkulu akakhethi ubuso bamuntu -- ngokuba kimi abadumileyo abenezelanga lutho. ⁷ Kepha kunalokho , lapho bebona ukuthi ngithenjiwe ngevangeli kwabangasokiyo njengoPetru kwabasokayo, ⁸ ngokuba yena owanika uPetru amandla ukuba abe ngumphostoli wabasokayo wanginika nami amandla ukuba ngibe ngumphostoli wabezizwe, ⁹ bathi ukubona umusa engiwuphiweyo , oJakobe noKhefase noJohane , ababaziswa ngokuthi bayizinsika , banika mina noBarnaba isandla sokunene sokuhlangana ukuba thina siye kwabezizwe, kepha bona baye kwabasokayo, ¹⁰ kuphela ukuba sikhumbule abampofu , eyonanto nami ebengikhuthalele ukuyenza. UPawulu walwela ivangeli emelene noPetru e-Antiyokiya ¹¹ Kepha ekufikeni kukaKhefase e -Antiyokiya ngamelana naye ubuso nobuso , ngokuba wayenecala. ¹² Ngokuba bengakafiki abanye ababevela kuJakobe , wayedla nabezizwe ; kepha kuthe ukuba kufike bona , wamonyuka, wazahlukanisa nabo , esaba abokusoka. ¹³ Nabanye abaJuda futhi bazenzisa kanye naye, waze wathatheka noBarnaba ngokuzenzisa kwabo. ¹⁴ Kepha kuthe sengibonile ukuthi kabahambisi ngokweqiniso levangeli , ngathi kuKhefase phambi kwabo bonke : Uma wena ongumJuda uhamba ngokwabezizwe, ungahambi ngokwabaJuda , ubaphoqa kanjani abezizwe ukuba bahambe ngokwabaJuda na? ¹⁵ Thina singabaJuda ngemvelo, singesizo izoni zabezizwe; ¹⁶ kepha lokhu sazi ukuthi umuntu akalungisiswa ngemisebenzi yomthetho , kuphela ngokukholwa nguKristu Jesu , nathi sakholwa nguKristu Jesu ukuba silungisiswe ngokukholwa nguKristu kungengemisebenzi yomthetho; ngokuba ngemisebenzi yomthetho akuyikulungisiswa nyama. ¹⁷ Kepha uma thina , lapho sifuna ukulungisiswa ngoKristu , nathi uqobo safunyanwa siyizoni, kanti uKristu uyisikhonzi sesono na? Qha nakanye. ¹⁸ Ngokuba uma ngibuye ngakhe engikudilizileyo , ngifakaza ukuthi ngingoweqa umthetho. ¹⁹ Ngokuba ngomthetho mina ngafa kuwo umthetho , ukuze ngiphilele uNkulunkulu. Ngibethelwe kanye noKristu; ²⁰ akuseyimi ophilayo , kepha uKristu uphila kimi ; kodwa ukuphila engikuphilayo kalokhu enyameni ngikuphila ngokukholwa , okungukukholwa yiNdodana kaNkulunkulu eyangithandayo, yazinikela ngenxa yami. ²¹ Angiwenzi ize umusa kaNkulunkulu , ngokuba uma ukulunga kuya ngomthetho, khona uKristu wafela ize.