¹ Emva kwezinsuku eziyisithupha uJesu wa thatha oPetru , noJakobe, noJohane umfowabo, wakhuphukela nabo entabeni ende bebodwa. ² Waphenduka esinye isimo phambi kwabo ; ubuso bakhe bakhanya njengelanga, izingubo zakhe zaba mhlophe njengokukhanya. ³ Bheka, kwabonakala kubo oMose no-Eliya bekhuluma naye. ⁴ Wathatha uPetru wathi kuJesu : Nkosi, kuhle ukuba silapha . Uma uthanda, ngizakwakha lapha amadokodo amathathu , elinye libe ngelakho , elinye libe ngelikaMose, elinye libe ngelika-Eliya. ⁵ Esakhuluma, bheka ifu elikhanyayo labasithibeza ; bheka, kwavela izw i efwini, lathi: Lo uyiNdodana yami ethandekayo engithokozile ngayo; yizweni. ⁶ Kuthe sebezwa lokho abafundi, bawa ngobuso babo, besaba kakhulu. ⁷ Kepha uJesu wasondela, wabathinta, wathi: Sukumani, ningesabi. ⁸ Kepha bephakamisa amehlo abo ababonanga muntu, kuphela uJesu yedwa. ⁹ Besehla entabeni , uJesu wabayala wathi : Ningatsheli muntu lowo mbono , ize ivuke iNdodana yomuntu kwabafileyo. ¹⁰ Bambuza abafundi, bathi: Pho, basholoni ababhali ukuthi u -Eliya umelwe ukufika kuqala na? ¹¹ Waphendula wathi: Nempela u-Eliya uyeza, uyakubuyisela konke. ¹² Kepha ngithi kini: U-Eliya sewafika; abamazanga nokho, kodwa benza kuye abakuthandayo. Kanjalo neNdodana yomuntu iyakuhlushwa yibo. ¹³ Khona abafundi baqonda ukuba ubekhuluma kubo ngoJohane uMbhapathizi. Ukuphulukiswa komfana onesithuthwane (Mark. 9:14; Luk. 9:37) ¹⁴ Sebefikile esixukwini , kweza kuye umuntu , waguqa ngamadolo phambi kwakhe, ¹⁵ wathi: Nkosi, hawukela indodana yami, ngokuba inesithuthwane, ihlupheka kabi, lokhu iwela kaningi emlilweni, kaningi emanzini. ¹⁶ Ngiyilethe kubafundi bakho, kepha bahluleka ukuyiphulukisa. ¹⁷ UJesu waphendula wathi : O! sizukulwane esingakholwayo nesiphambeneyo, koze kube nini nginani na ? Koze kube nini nginibekezelela na? Yiletheni lapha kimi. ¹⁸ UJesu wayeseyikhuza , idemoni laphuma kuyo ; umfana waphulukiswa kusukela kuleso sikhathi. ¹⁹ Khona kwafika abafundi kuJesu bebodwa , bathi: Thina besingemkhiphe ngani na? ²⁰ Wayesethi kubo : Kungenxa yokukholwa kwenu okuncane . Ngokuba ngiqinisile ngithi kini: Uma ninokukholwa njengembewu yesinaphi, niyakuthi kule ntaba: Suka lapha, uye laphaya, iyakusuka; akukho okuyakunahlula. ²¹ Kepha lolo hlobo aluphumi ngaphandle kokuba kube ngokukhuleka nokuzila ukudla. UJesu ukhuluma futhi ngokuhlupheka kwakhe. Imali yethempeli (Mark. 9:30; Luk. 9:43) ²² Besahambahamba eGalile , uJesu wathi kubo : INdodana yomuntu izakukhashelwa ezandleni zabantu; ²³ bazakuyibulala, kepha ngosuku lwesithathu izakuvuswa . Badabuka kakhulu. ²⁴ Kwathi ukuba bafike eKapernawume , abaqoqi bemali yethempeli beza kuPetru, bathi: Umfundisi wenu akayitheli imali yethempeli na? ²⁵ Wathi: Uyayithela. Esengene endlini uJesu wamandulela , wathi: Usho ukuthini, Simoni? Amakhosi omhlaba athatha kubaphi intela nenkokhiso , kumadodana awo noma kubafo, na? ²⁶ Wathi: Kubafo. UJesu wayesethi: Ngakho-ke amadodana akhululekile. ²⁷ Kodwa-ke ukuba singabakhubekisi, yana elwandle, uphonse udobo, ubambe inhlanzi ephuma kuqala ; wothi ukuba uyivule umlomo , uzakufumana imali; yithathe, ubanike, usithelele mina nawe.