¹ UJehova wathi kuMose: Manje usuzakubona lokho engiyakukwenza kuFaro, ngokuba ngenxa yesandla esiqinileyo uyakubayeka ukuba bahambe , nangenxa yesandla esinamandla uyakubaxosha ezweni lakhe. ² UNkulunkulu wakhuluma kuMose, wathi kuye: NginguJehova; ³ ngabonakala ku-Abrahama, naku-Isaka, nakuJakobe njengoSomandla, kepha ngegama lami lokuthi uJehova ngangingaziwa kubo. ⁴ Futhi ngamisa isivumelwano sami nabo ukuyobanika izwe laseKhanani, izwe lokugogobala kwabo, lapho bebegogobala khona. ⁵ Yebo, futhi ngizwile ukububula kwabantwana bakwa -Israyeli abenziwe izigqila ngabaseGibithe; ngiyakhumbula isivumelwano sami. ⁶ Ngalokho yisho kubantwana bakwa -Israyeli ukuthi : NginguJehova; ngizakunikhipha emithwalweni yabaseGibithe, nginikhulule ebugqileni benu, nginihlenge ngengalo eyeluliweyo nangezahlulelo ezinkulu. ⁷ Ngiyakunithatha nibe yisizwe sami , mina ngibe nguNkulunkulu wenu ; niyokwazi ukuthi nginguJehova uNkulunkulu wenu onikhipha emithwalweni yabaseGibithe. ⁸ Ngiyakuningenisa ezweni engaphakamisa isandla sami ngalo ukulinika u - Abrahama, no-Isaka, noJakobe; ngiyakunipha lona libe yifa; nginguJehova. ⁹ UMose wakhuluma -ke kanjalo kubo abantwana bakwa -Israyeli; kepha abamlalelanga uMose ngenxa yenhliziyo encane nemisebenzi esindayo. ¹⁰ UJehova wakhuluma kuMose, wathi: ¹¹ Ngena ukhulume kuFaro inkosi yaseGibithe ukuba ivumele abantwana bakwa-Israyeli ukuphuma ezweni lakhe. ¹² UMose wakhuluma ebusweni bukaJehova , wathi: Bheka, abantwana bakwa-Israyeli abangilalelanga ; uFaro angangilalela kanjani , nginezindebe zomlomo ezingasokwanga, na? ¹³ UJehova wakhuluma kuMose naku -Aroni ukuba bayale abakwa -Israyeli noFaro inkosi yaseGibithe ukukhipha abantwana bakwa -Israyeli ezweni laseGibithe. Inzalo kaMose neka-Aroni ¹⁴ Laba bayizinhloko zezindlu zawoyise : amadodana kaRubeni izibulo lika - Israyeli: ngoHanoki, noPhalu, noHesironi, noKarmi; yile imindeni kaRubeni. ¹⁵ Amadodana kaSimeyoni : ngoJemuweli, noJamini, no-Ohade, noJakini, noSohari, noShawule indodana yowesifazane waseKhanani ; yile imindeni kaSimeyoni. ¹⁶ Lawa angamagama amadodana kaLevi ngezizukulwane zawo : ngoGereshoni, noKohati, noMerari; iminyaka yokuhamba kukaLevi yayiyiminyaka eyikhulu namashumi amathathu nesikhombisa. ¹⁷ Amadodana kaGereshoni: ngoLibini noShimeyi ngemindeni yawo. ¹⁸ Amadodana kaKohati : ngo-Amramu, noJisihari, noHebroni, no-Uziyeli; iminyaka yokuhamba kukaKohati yayiyiminyaka eyikhulu namashumi amathathu nantathu. ¹⁹ Amadodana kaMerari : ngoMaheli noMushi ; yile imindeni y amaLevi ngezizukulwane zayo. ²⁰ U-Amramu wazithathela uJokebedi udadewabo kayise , abe ngumkakhe ; wamzalela o-Aroni noMose; iminyaka yokuhamba kuka-Amramu yayiyikhulu namashumi amathathu nesikhombisa. ²¹ Amadodana kaJisihari: ngoKora, noNefegi, noZikiri. ²² Amadodana ka-Uziyeli: ngoMishayeli, no-Elisafani, noSitri. ²³ U-Aroni wazithathela u -Elisheba indodakazi ka -Aminadaba, udadewabo kaNaheshoni, abe ngumkakhe; wamzalela oNadabi, no-Abihu, no-Eleyazare, no-Itamari. ²⁴ Amadodana kaKora: ngo-Asiri, no-Elkana, no-Abiyasafa; yile imindeni kaKora. ²⁵ U-Eleyazare indodana ka -Aroni wazithathela enye yamadodakazi kaPhuthiyeli, ibe ngumkakhe; yamzalela uFinehasi. Yilezi izinhloko zawoyise bamaLevi ngemindeni yawo. ²⁶ Yibo labo o-Aroni noMose uJehova athi kubo : Khiphani ezweni laseGibithe abantwana bakwa-Israyeli ngamabandla abo. ²⁷ Yibo labo ababekhuluma kuFaro inkosi yaseGibithe ukuba akhiphe abantwana bakwa-Israyeli eGibithe; yibo oMose no-Aroni. ²⁸ Kwathi mhla uJehova ekhuluma kuMose ezweni laseGibithe, ²⁹ uJehova washo kuMo se, wathi: NginguJehova; khuluma kuFaro inkosi yaseGibithe konke engikukhuluma kuwe. ³⁰ Wayesethi uMose ebusweni bukaJehova: Bheka, ngingowezindebe zomlomo ezingasokiwe; uFaro angangilalela kanjani na?