¹ UJakobe waphakamisa amehlo akhe , wabheka, nango u -Esawu eza enamadoda angamakhulu amane . Abantwana wabahlukanisela oLeya , noRaheli, nezincekukazi zombili. ² Wabeka izincekukazi n abantwana bazo ngaphambili, uLeya nabantwana bakhe ngasemuva, oRaheli noJosefa ngasekugcineni. ³ Yena uqobo wadlulela phambi kwabo , wakhothamela emhlabathini kasikhombisa, waze wafika kumfowabo. ⁴ U-Esawu wagijima ukumhlangabeza, wamgona, wawa ngasentanyeni yakhe, wamanga; bakhala. ⁵ Waphakamisa amehlo akhe , wabona abesifazane nabantwana , wathi: Bangobani laba onabo na ? Wathi: Bangabantwana uNkulunkulu ayiphe bona inceku yakho ngomusa. ⁶ Zase zisondela izincekukazi, zona nabantwana bazo, bakhothama. ⁷ Wasondela noLeya nabantwana bakhe , bakhothama; ngasemuva wafika uJosefa enoRaheli, bakhothama. ⁸ Wayesethi: Uqondeni ngawo wonke lombonda engihlangana nawo na ? Wathi: Ukuba ngifumane umusa emehlweni enkosi yami. ⁹ Kepha u -Esawu wathi : Nginokuningi, mfowethu; okwakho makube ngokwakho. ¹⁰ UJakobe wathi : Hhayi bo ; uma ngifumene umusa emehlweni akho , samukele isipho sami esandleni sami , ngokuba ngibone ubuso bakho esengathi ngibona ubuso bukaNkulunkulu, wathokoza ngami. ¹¹ Mawusamukele isibusiso sami esilethwa kuwe , ngokuba uNkulunkulu ungenzele umusa nangokuba nginakho konke . Wamcindezela; wasamukela- ke. ¹² Wayesethi: Asisuke sihambe, ngihambe phambi kwakho. ¹³ Wathi kuye: Inkosi yami iyazi ukuthi abantwana bancane nokuthi izimvu nezinkomazi ezinami ziyizindlezane ; uma bezish ishinga usuku olulodwa , umhlambi wonke uyakufa. ¹⁴ Ake idlule inkosi phambi kwenceku yayo , mina ngiseseze njengokuhamba kwempahla ephambi kwami nanjengokuhamba kwabantwana , ngize ngifike enkosini yami eSeyiri. ¹⁵ U-Esawu wathi: Ake ngishiye kuwe abanye abant u bami. Wathi: Ngani na? Mangifumane umusa emehlweni enkosi. ¹⁶ U-Esawu wayesebuyela endleleni yakhe ngalolo suku, waya eSeyiri. ¹⁷ UJakobe wasuka waya eSukoti , wazakhela indlu, wenzela izinkomo zakhe amathanga; ngalokho igama laleyo ndawo lathiwa iSukoti. ¹⁸ UJakobe wafika kahle emzini waseShekemi osezweni laseKhanani , evela ePhadani Aramu; wamisa itende lakhe phambi komuzi. ¹⁹ Wathenga isiqephu sezwe , lapho ebemise khona itende lakhe , esandleni samadodana kaHamori uyise kaShekemi ngamakesita ayikhulu. ²⁰ Wakha khona i-altare, walibiza ngokuthi i-Eli Elohe Israyeli.