¹ Wayesethatha uSofari waseNahama, wathi: ² Awayikuphendulwa amazwi amaningi kangaka na ? Umuntu oliphoshophosho angathethelelwa na? ³ Ukugavuza kwakho kuthulisa abantu na ? Nalapho ukloloda , akakho ongakuhlaza na? ⁴ Ngokuba uthi: Ukufundisa kwami kulungile; ngimhlophe emehlweni akho. ⁵ Sengathi uNkulunkulu angakhuluma, akuvulele izindebe zakhe, ⁶ akwazise izimfihlakalo zokuhlakanipha , ngokuba ukuqonda kwakhe kuninginingi, uze wazi ukuthi uNkulunkulu , ukuba kube kuhle kuwe , wenza ukuba ikhohlakale inxenye yecala lakho. ⁷ Ungathola imfihlakalo kaNkulunkulu na ? Ungamfumana uSomandla kuze kube sekupheleleni kwakhe na? ⁸ Kuphakeme njengezulu -- ungenzani na? Kujulile kunendawo yabafileyo -- ungazini na? ⁹ Isilinganiso sakho side kunomhlaba, sibanzi kunolwandle. ¹⁰ Uma edlula, avalele, abizele ekwahluleleni, ngubani ongamkhalima na? ¹¹ Ngokuba uyabazi abantu ababi; lapho ebona ukona, akayikukunaka na? ¹² Umuntu oyize uyakuba nengqondo, nxa ithole lembongolo yasendle lizalwa libe ngumuntu. ¹³ Uma ulungisa inhliziyo yakho, welulele izandla zakho kuye; ¹⁴ uma udedisele kude ukona okusesandleni sakho , ungahlalisi ububi ematendeni akho, ¹⁵ khona uyakuphakamisa ubuso bakho ungenamahloni, uqine, ungesabi. ¹⁶ Ngokuba uyakukhohlwa ukuhlupheka kwakho , ukukhumbule kunjengamanzi adlulileyo. ¹⁷ Ukuphila kwakho kuyakusa kunemini; noma kuhlwa, kuyakuba njengokusa nje. ¹⁸ Uyakuba nokwethemba , ngokuba ithemba likhona ; uyakuphendla, ulale ngokulondeka. ¹⁹ Uyakulala, ungethuswa muntu; abaningi bayakuzincengela kuwe. ²⁰ Kepha amehlo ababi ayakufiphala ; abayikuba nandawo yokuphephela ; ithemba labo liyakuba ngukuphuma komphefumulo.