¹ Umuntu makasazi ukuthi siyizikhonzi zikaKristu nabaphathi bezimfihlakalo zikaNkulunkulu. ² Futhi-ke kufuneka kubaphathi ukuba umuntu afunyanwe ekholekile. ³ Kepha kimina kuyinto encane impela ukuba ngahlulelwe yi nina noma ngokwahlulela kwabantu; yebo, nami angizahluleli. ⁴ Ngokuba angizinyezi ngalutho ngokwami, nokho angilungisisiwe ngalokho; kepha ongahlulelayo yiNkosi. ⁵ Ngakho-ke ningahluleli lutho singakafiki isikhathi , ingakafiki iNkosi eyakukuveza ekukhanyeni okufihlakeleyo kobumnyama, iveze obala izizindlo zezinhliziyo; lapho-ke yilowo nalowo uyakuthola ukubongwa kuNkulunkulu. Ukukhukhumala kwabaseKorinte nokuhlupheka kwabaphostoli ⁶ Lokhu-ke, bazalwane, ngikuguqulele kimina naku -Apholo ngokulinganisa ngenxa yenu, ukuze nifunde kithi ukungeqisi kokulotshiweyo ukuba ningakhukhunyezwa, kungabi yilowo akhethe omunye kunomunye. ⁷ Ngokuba ngubani okhetha wena na ? Unantoni ongayamukeliswanga na ? Kepha uma uyamukelisiwe, uzibongelani kungathi awuyamukeliswanga na? ⁸ Senize nasutha , senize naceba , senabusa ngaphandle kwethu ; yebo-ke sengathi ngabe niyabusa, ukuze nathi sibuse kanye nani. ⁹ Ngokuba ngithi kungathi uNkulunkulu usimisile thina baphostoli sibe ngabokugcina, sibe njengabanqunyelwe ukufa; ngokuba senziwe umbukwane wezwe nowezingelosi nowabantu. ¹⁰ Thina siyiziwula ngenxa kaKristu , kepha nina nihlakaniphile kuKristu ; thina sibuthakathaka , kepha nina ninamandla ; nina niyadunyiswa , kepha thina siyadunyazwa. ¹¹ Kuze kube yisona lesi sikhathi silambile , somile, sihamba ze , siyamuhluzwa, siyimihambima, ¹² siyakhandleka, sisebenza ngezandla zethu ; sithi sithukwa , sibe sibusisa ; sithi sizingelwa, sibe sibekezela; ¹³ sithi sihletshwa, sibe siphendula kahle ; senziwe kungathi siyinsila yezwe , umphucuzo wezinto zonke kuze kube manje. ¹⁴ Angikulobi lokho ukuba nginithele amahloni , kodwa ukuba nginiluleke njengabantwana bami abathandekayo. ¹⁵ Ngokuba noma ninabafundisi abayizinkulungwane eziyishumi kuKristu , nokho oyihlo kababaningi , ngokuba mina nganizala kuKristu Jesu ngevangeli. ¹⁶ Ngakho-ke ngiyanincenga ukuthi: Yibani abalingisi bami. ¹⁷ Ngalokho-ke ngithumele kini uThimothewu ongumntanami othandekayo nothembekayo eNkosini , oyakunikhumbuza ngokuhamba kwami okukuKristu, njengokuba ngifundisa ezindaweni zonke emabandleni onke. ¹⁸ Kepha abanye bakhukhumele ngokungathi angiyikuza kini; ¹⁹ kodwa ngizakuza kini masinyane , uma iNkosi ivuma, ukuze ngazi, angisho amazwi alaba abakhukhumeleyo kepha amandla abo. ²⁰ Ngokuba umbuso kaNkulunkulu awuyi ngezwi kepha ngamandla. ²¹ Pho, nifunani? Ngize kini ngiphethe induku , noma ngize nginothando nomoya omnene na?