¹ Izizwe zonke zakwa-Israyeli zafika kuDavide eHebroni , zasho zathi: Bheka, thina siyithambo lakho nenyama yakho. ² Ngesikhathi esidlulileyo , uSawule eseyinkosi phezu kwethu , nguwe owakhipha nowangenisa u-Israyeli; uJehova wathi kuwe : Wena uyakwalusa abantu bami u-Israyeli, wena uyakuba ngumbusi wakwa-Israyeli. ³ Kwase kufika onke amalunga akwa -Israyeli enkosini eHebroni ; inkosi uDavide yenza isivumelwano nawo eHebroni phambi kukaJehova ; amgcoba uDavide abe yinkosi kwa-Israyeli. ⁴ UDavide wayeneminyaka engamashumi amathathu ekuqaleni kwakhe ukubusa; wabusa iminyaka engamashumi amane. ⁵ EHebroni wabusa kwaJuda iminyaka eyisikhombisa nezinyanga eziyisithupha; eJerusalema wabusa iminyaka engamashum i amathathu nantathu kwa-Israyeli wonke nakwaJuda. ⁶ Inkosi nabantu bayo baya eJerusalema ukulwa namaJebusi ayakhe kulelo zwe; asho kuDavide, athi: Awuyikungena lapha; uyakususwa yizimpumputhe nezinyonga, ecabanga ukuthi uDavide angengene lapha. ⁷ UDavide wathatha nokho inqaba yaseSiyoni engumuzi kaDavide. ⁸ UDavide wathi ngalolo suku: Yilowo nalowo ochitha amaJebusi makasukele emseleni wamanzi izinyonga nezimpumputhe lezo ezizondwa ngumphefumulo kaDavide ; ngalokho kuthiwa : Izimpumputhe nezinyonga azinakungena endlini. ⁹ UDavide wahlala enqabeni , wayibiza ngokuthi umuzi kaDavide . UDavide wakha nxazonke kusukela eMilo kuya ngaphakathi. ¹⁰ UDavide waqhubeka njalo ngokukhula , ngokuba uJehova uNkulunkulu Sebawoti wayenaye. ¹¹ UHiramu inkosi yaseTire wathuma izithun ywa kuDavide , nemisedari, nababazi bemithi, nabakhi; bamakhela uDavide indlu. ¹² UDavide waqonda ukuthi uJehova wayemmisile impela ukuba abe yinkosi kwa-Israyeli nokuthi uphakamisile umbuso wakhe ngenxa yabantu bakhe u - Israyeli. ¹³ UDavide wazithathela ezin ye izancinza nabafazi eJerusalema , esefikile evela eHebroni; uDavide wayesazalelwa amadodana namadodakazi. ¹⁴ Nanka amagama abazalelwa eJerusalema : oShamuwa, noShobabi, noNathani, noSolomoni, ¹⁵ noJibari, no-Elishuwa, noNefegi, noJafiya, ¹⁶ no-Elishama, no-Eliyada, no-Elifeleti. ¹⁷ Lapho amaFilisti esezwile ukuthi bamgcobile uDavide ukuba abe yinkosi kwa-Israyeli, onke amaFilisti enyuka ukumfuna uDavide ; uDavide wakuzwa, wehlela enqabeni. ¹⁸ AmaFilisti esefikile ahlakazeka esiGodini samaRefa. ¹⁹ UDavide wabuza kuJehova, wathi: Ngiyakwenyuka, ngihlasele amaFilisti na? Uyakuwanikela esandleni sami na ? UJehova wathi kuDavide : Yenyuka, ngokuba ngiyakuwanikela impela amaFilisti esandleni sakho. ²⁰ UDavide wafika eBali Pherasimi , uDavide wawachitha khona ; wathi: UJehova ufohlile ezitheni zami phambi kwami njengokufohla kwamanzi . Ngalokho waqamba igama laleyo ndawo ngokuthi iBali Pherasimi. ²¹ Ashiya izithombe zawo lapho; uDavide nabantu bakhe bahamba nazo. ²² AmaFilisti abuye enyuka, ahlakazeka esiGodini samaRefa. ²³ Lapho uDavide ebuza kuJehova , wathi yena: Awuyikwenyuka; gwegwesa emva kwawo, uwafikele malungana namajikijolo. ²⁴ Kuyakuthi lapho usuzwa umsindo wokuhamba ezihlokweni zamajikijolo , usheshe, ngokuba kuyilapho uJehova eyakube ephumile ngaphambi kwakho ukuchitha impi yamaFilisti. ²⁵ UDavide wenze njalo njengalokho uJehova emyalile , wachitha amaFilisti kusukela eGeba kuze kufike eGezeri.