¹ USamsoni wehlela eT himna; wabona owesifazane eThimna wamadodakazi amaFilisti. ² Wakhuphuka, wabatshela uyise nonina , wathi: Ngibonile owesifazane eThimna wamadodakazi amaFilisti ; ngalokho ngithatheleni yena abe ngumkami. ³ Uyise nonina base bethi kuye : Akakho yini owesifazane phakathi kwamadodakazi abafowenu noma phakathi kwabo bonke abantu bami, ukuze uye kuthatha umfazi kumaFilisti angasokile , na? USamsoni wathi kuyise : Ngithathele yena, ngokuba uyathandeka kimi. ⁴ Kepha uyise nonina babengazi ukuthi lokho kwavela kuJehova , ngokuba wayefuna ithuba lokulwa namaFilisti . Ngaleso sikhathi amaFilisti ayebusa phezu kuka-Israyeli. ⁵ USamsoni wayesehla noyise nonina , baya eThimna , bafika ezivinini zaseThimna; bheka, ibhongo lengonyama lamhlangabeza libhodla. ⁶ UMoya kaJehova wafika phezu kwakhe ngamandla, walidwengula kungathi udwengula izinyane lembuzi , engaphethe lutho esandleni sakhe : kepha akabatshelanga uyise nonina abekwenzile. ⁷ Wehla, wakhuluma nowesifazane; wathandeka kuSamsoni. ⁸ Emva kwesikhathi wabuya ukuba amthathe, waphambuka ukuyobona isidumbu sengonyama ; bheka, kwakukhona iqulo lezinyosi esidumbini sengonyama kanye noju. ⁹ Wazitapa ngezandla zakhe, wahamba, wahamba edla, wafika kuyise nonina, wabapha, badla nabo ; kepha akabatshelanga ukuthi wayetape izinyo si esidumbini sengonyama. ¹⁰ Uyise wehla , waya kulowo wesifazane , uSamsoni wenza idili khona , ngokuba zazenze njalo izinsizwa. ¹¹ Kwathi lapho bembona, baletha abayeni abangamashumi amathathu ukuba babe naye. ¹² USamsoni wathi kubo: Ake ngininike imfumbe; uma ningitshela yona kahle ngezinsuku eziyisikhombisa zedili , niyiqandele, ngiyakuninika amayembe angamashumi amathathu nezingubo zokuphendulela ezingamashumi amathathu; ¹³ kepha uma ningenakuyiqandela kimi , niyakunginika amayembe angamashumi amathathu nezingubo zokuphendulela ezingamashumi amathathu. Bathi kuye: Yisho imfumbe yakho ukuba siyizwe. ¹⁴ Wayesethi kubo : Kodlayo kwaphuma ukudla , konamandla kwavela okumnandi. Babengenakuyiqandela imfumbe ngezinsuku ezintathu. ¹⁵ Kwathi ngosuku lwesikhombisa bathi kumkaSamsoni: Yenza umyeni wakho ukuba asichasisele imfumbe , funa sikushise wena nendlu kayihlo ngomlilo ; nisimemele ukuba nisidle na? Akunjalo na? ¹⁶ UmkaSamsoni wakhala phambi kwakhe , wathi: Uyangizonda kuphela , awungithandi; unikile abakithi imfumbe, awungitshelanga yona. Wathi kuye: Bheka, angibatshelanga ubaba nomame, ngiyakukutshela wena na? ¹⁷ Wakhala phambi kwakhe izinsuku eziyisikhombisa , lisekhona idili labo ; kwathi ngosuku lwesikhombisa wayesemtshela, ngokuba wamcindezela kakhulu; wayisho imfumbe kwabakubo. ¹⁸ Abantu bom uzi bathi kuye ngosuku lwesikhombisa , lingakashoni ilanga : Kuyini okumnandi kunezinyosi ? Kuyini okunamandla kunengonyama na ? Wathi kubo: Uma beningalimanga ngesithokazi sami , ngabe ningayiqandelanga imfumbe yami. ¹⁹ UMoya kaJehova wafika kuye ngamandla , wehlela e-Ashikeloni, wabulala abantu abangamashumi amathathu kubo , wathatha isambatho sabo , wabanika abayiqandele imfumbe izingubo zokuphendulela. Intukuthelo yakhe yavutha, wenyukela endlini kayise. ²⁰ Kepha umkaSamsoni wanikwa kumngane wakhe owabe ngomunye wabayeni bakhe.