¹ Othanda ukulaywa uthanda ukwazi; ozonda ukusolwa uyisiwula. ² Omuhle uthola umusa kuJehova, kepha umuntu wamacebo uyamlahla. ³ Umuntu akanakuma ngobubi , kepha impande yabalungileyo ayiyikunyakaziswa. ⁴ Owesifazane okhutheleyo ungumqhele kuyo indoda yakhe , kepha ohlazisayo unjengokubola kwamathambo ayo. ⁵ Imicabango yabalungileyo ingeyokwahlulela , kepha iziluleko zababi ziyinkohliso. ⁶ Amazwi ababi aqamekela igazi, kepha umlomo wabaqotho uyabophula. ⁷ Ababi bayachithwa, bangabikho, kepha indlu yabalungileyo iyakuma. ⁸ Umuntu uyadunyiswa ngokokuhlakanipha kwa khe, kepha ophambene ngenhliziyo uyadelelwa. ⁹ Odelelwayo eyinceku udlula ozidumisayo eswele ukudla. ¹⁰ Olungileyo uyakunaka ukuphila kwesilwane sakhe , kepha isihhe sababi silunya. ¹¹ Olima insimu yakhe uyakusutha ngokudla , kepha olandela amayiyane akanangqondo. ¹² Ishinga lifisa impango yababi, kepha impande yabalungileyo iyathela. ¹³ Ngokuphambeka kwezindebe kukhona ugibe lomubi , kepha olungileyo uyaphuma ekuhluphekeni. ¹⁴ Umuntu uyasutha ngokuhle ngesithelo somlomo wakhe , nemisebenzi yezandla zomuntu iyabuyela kuye. ¹⁵ Indlela yesiwula ilungile emehlweni aso , kepha ohlakaniphileyo ulalela iziluleko. ¹⁶ Ukukhathazeka kwesiwula kuyaziwa ngosuku , kepha oqondileyo uyasibekela ihlazo. ¹⁷ Ophefumula iqiniso ulanda ngokulunga , kepha ufakazi wamanga ngenkohliso. ¹⁸ Bakhona abaphahluka njengokuhlaba kwenkemba , kepha izilimi zabahlakaniphileyo ziyimpiliso. ¹⁹ Indebe yeqiniso iyakuma kuze kube phakade , kepha ulimi lwamanga lungolomzuzwana nje. ²⁰ Inkohliso isezinhliziyweni zabaceba okubi , kepha abaluleka ukuthula , kubona kukhona intokozo. ²¹ Olungileyo akayikwehlelwa nangokukodwa okubi , kepha ababi bayakugcwala ububi. ²² Izindebe zamanga ziyisinengiso kuJehova , kepha abenza iqiniso bayintokozo yakhe. ²³ Umuntu oqondileyo uyafihla ukwazi, kepha izinhliziyo zeziwula zimemeza ubuwula. ²⁴ Isandla sabakhutheleyo siyakubusa , kepha izidenge ziyakuphoqelwa umsebenzi. ²⁵ Ukukhathazeka enhliziyweni yomuntu kuyayithobisa , kepha izwi elihle liyayithokozisa. ²⁶ Olungileyo ungumholi womakhelwane wakhe , kepha indlela yababi iyabadukisa. ²⁷ Isidenge asiyosi inyamazane yaso , kepha imfuyo enqabileyo ingeyokhutheleyo. ²⁸ Endleleni yokulunga kukhona ukuphila , nalapho umkhondo wakho udlula khona, akukho ukufa.