¹ Wayesethi kubafundi bakhe : Kungeze kwenzeka ukuba kungaveli izikhubekiso; kodwa maye kulowo ezivela ngaye! ² Kungcono kuye ukuba itshe lokusila l igaxwe entanyeni yakhe , alahlwe elwandle, kunokuba akhubekise abe munye kulaba abancinyane. ³ Xwayani nina. Uma umfowenu ona, mkhuze; uma ephenduka, mthethelele. ⁴ Noma ekonela kasikhombisa ngosuku , abuyele kuwe kasikhombisa , ethi: Ngiyaphenduka, womthethelela. ⁵ Abaphostoli base bethi eNkosini: Yandisa ukukholwa kwethu. ⁶ Yayisithi iNkosi : Uma beninokukholwa okungangenhlamvu yesinaphi , beningasho kulo mthombe: Simbuka, utshaleke elwandle, ubuyakunilalela. ⁷ Ngumuphi kini onenceku elimayo nokuba eyalusayo, athi kuyo ibuya endle: Sondela masinyane, uhlale phansi, udle ? ⁸ Kodwa akayikusho kuyo ukuthi: Lungisa engizakukudla , uzibophe, ungiphakele, ngize ngidle, ngiphuze, andukuba udle, uphuze wena, na? ⁹ Uyayibonga yini inceku, ngokuba yenzile ekuyaliweyo na? ¹⁰ Kunjalo nani , nxa nikwenzile konke enikuyaliweyo , anothi: Asizinceku zalutho; sikwenzile nje ebesifanele ukukwenza. Ukuphulukiswa kwabanochoko abayishumi ¹¹ Kwathi esehamba ukuya eJerusalema, wadabula iSamariya neGalile. ¹² Esangena emzaneni othile , kwahlangana naye amadoda ayishumi anochoko, amela kude, ¹³ aphakamisa izwi, athi: Jesu Nkosi, sihawukele! ¹⁴ Kuthe ewabona , wathi kuwo : Hambani, niyoziveza kubapristi . Kwathi esahamba, ahlanjululwa. ¹⁵ Enye yawo isibona ukuthi iphulukisiwe , yabuya imdumisa uNkulunku lu ngezwi elikhulu, ¹⁶ yawa ngobuso ngasezinyaweni zakhe imbonga; yayingumSamariya. ¹⁷ Kepha uJesu waphendula wathi: Akuhlanjululwanga abayishumi na? Baphi, pho, abayisishiyagalolunye na? ¹⁸ Abafunyaniswanga yini ababuyela ukumnika uNkulunkulu udumo , kuphela lona wezizwe na? ¹⁹ Wayesethi kuye: Sukuma uhambe; ukukholwa kwakho kukusindisile. Umbuso kaNkulunkulu; ukubuya kweNdodana yomuntu ²⁰ Ebuzwe ngabaFarisi ukuthi umbuso kaNkulunkulu uzakufika nini , wabaphendula wathi: Umbuso kaNkulunkulu awufiki ubonwa ngamehlo. ²¹ Futhi kabayikusho ukuthi : Bhekani, nanku, nokuba, nankuya; ngokuba bhekani, umbuso kaNkulunkulu uphakathi kini. ²² Wayesethi kubafundi bakhe: Kuzakufika izinsuku, lapho niyakufisa ukubona lube lunye lwezinsuku zeNdodana yomuntu, kepha aniyikulubona. ²³ Bayakuthi kini: Bhekani, nansiya; bhekani, nansi; maningayi, ningalandeli. ²⁴ Ngokuba njengonyazi , nxa lunyazima kwenye indawo phansi kwezulu , lukhanya luze lufike kwenye indawo phansi kwezulu , yoba njalo iNdodana yomuntu ngosuku lwayo. ²⁵ Kepha kuqala imelwe ukuhlupheka ngokuningi, yaliwe yilesi sizukulwane. ²⁶ Njengokuba kwenzeka emihleni kaNowa , kuyakuba njalo nasemihleni yeNdodana yomuntu. ²⁷ Babedla, bephuza, beganwa, bendiswa, kwaze kwafika usuku uNowa angena ngalo emkhunjini, kwafika uzamcolo, wababhubhisa bonke. ²⁸ Kanjalo njengokuba kwenzeka nasemihleni kaLoti , babedla, bephuza, bethenga, bethengisa, betshala, bakha; ²⁹ kepha ngosuku uLoti aphuma ngalo eSodoma lana umlilo nesibabule kuvela ezulwini, kwababhubhisa bonke; ³⁰ kuyakuba njalo ngosuku eyakwambulwa ngalo iNdodana yomuntu. ³¹ Ngalolo suku oyakuba phezu kwendlu , impahla yakhe isendlini , kangehli ukuyithatha; njalo nosensimini kangabuyeli emuva. ³² Khumbulani umkaLoti. ³³ Ofuna ukuzuza ukuphila kwakhe uyakulahlekelwa yikho , kepha olahlekelwa yikho uyakukulondoloza. ³⁴ Ngithi kini : Ngalobo busuku kuyakuba khona ababili embhedeni munye ; omunye uyakuthathwa, omunye ashiywe. ³⁵ Kuyakuba khona ababili besila ndawonye ; omunye uyakuthathwa, omunye ashiywe. ³⁶ Kuyakuba khona ababili ensimini; omunye uyakuthathwa, omunye ashiywe. ³⁷ Base bephendula, bethi kuye : Kuphi, Nkosi? Wathi kubo: Lapho kukhona isidumbu, kulapho amanqe eyakubuthana khona.