¹ Kwathi masinyane ekuseni abapristi abakhulu namalunga nababhali nomphakathi wonke benza icebo , bambopha uJesu , bamqhuba, bamnikela kuPilatu. ² UPilatu wambuza wathi : Wena uyinkosi yabaJuda na ? Waphendula, wathi kuye: Usho khona. ³ Abapristi abakhulu bammangalela ngokuningi. ⁴ UPilatu wabuye wambuza , wathi: Awuphenduli lutho na ? Bheka, bakuthwesa icala ngokuningi kangaka. ⁵ Kodwa uJesu akabe esaphendula lutho, waze wamangala uPilatu. ⁶ Kwathi ngomkhosi wayehleze ebakhululela isiboshwa sibe sinye abasicelayo. ⁷ Kwakukhona-ke omunye , nguBaraba igama lakhe , owayeboshiwe kanye namahlubuka; wona ayebulele umuntu ekuhlubukeni. ⁸ Isixuku senyuka , saqala ukucela ukuba abenzele njengalokho ebehleze ebenzela. ⁹ Kepha uPilatu wabaphendula wathi : Nithanda ukuba nginikhululele ink osi yabaJuda na? ¹⁰ Ngokuba wayekwazi ukuthi abapristi abakhulu bamnikele ngomhawu. ¹¹ Kepha abapristi abakhulu babhebhezela isixuku ukuba okungcono asikhululele uBaraba. ¹² UPilatu wabuye waphendula , wathi kubo: Pho-ke, ngimenzenjani lo enithi uyinkosi yabaJuda na? ¹³ Babuye bamemeza, bathi: Mbethele esiphambanweni! ¹⁴ Kodwa uPilatu wathi kubo : Ngokuba wenze bubi buni na ? Kepha bamemeza kakhulu, bathi: Mbethele esiphambanweni! ¹⁵ Khona uPilatu ethanda ukudelisa isixuku wasikhululela uBaraba , kepha wamshaya uJesu, wamnikela ukuba abethelwe esiphambanweni. ¹⁶ Amabutho ayesemngenisa phakathi endlini ethiwa iPretoriyu , abizela ndawonye ibutho lonke. ¹⁷ Ayesemembathisa ingubo ebubende , amcwashelisa ngomqhele ayeweluke ngameva. ¹⁸ Aqala ukumkhulekela, athi: Bayede, nkosi yabaJuda! ¹⁹ Amshaya ekhanda ngomhlanga , amkhafulela ngamathe, aguqa ngamadolo, akhuleka kuye. ²⁰ Esembhinqile amhlubula ingubo ebubende , amembathisa izingubo zakhe . Ayesephuma naye ukuba ambethele esiphambanweni. ²¹ Acindezela umuntu obedlula, uSimoni waseKhurene, evela endle, uyise ka- Aleksandru noRufu, ukuba athwale isiphambano sakhe. UJesu esesiphambanweni (Math. 27:33; Luk. 23:26; Joh. 19:17) ²² Ayesemyisa endaweni yaseGolgotha okungukuthi ngokuhunyushwa iNdawo Yekhanda. ²³ Amnika iwayini elixutshwe nemure; kepha akalamukelanga. ²⁴ Ayesembethela esiphambanweni, abelana izingubo zakhe, enzelana inkatho ngazo ukuthi yilowo nalowo uyakuthathani. ²⁵ Kwakuyihora lesithathu esembethela esiphambanweni. ²⁶ Umbhalo wecala lakhe ubulotshiwe ngaphezulu wokuthi : INKOSI YABAJUDA. ²⁷ Kwabethelwa kanye naye abaphangi ababili , omunye ngakwesokunene nomunye ngakwesokhohlo sakhe. ²⁸ Kwase kugcwaliseka umbhalo othi: Wabalwa kanye naboni. ²⁹ Abadlulayo bamhlambalaza benikina amakhanda abo , bathi: Eya wena odiliza ithempeli, ubuye ulakhe ngezinsuku ezintathu; ³⁰ zisindise, wehle esiphambanweni. ³¹ Kanjalo nabapristi abakhulu bambhinqa bebodwa kanye nababhali , bathi: Wasindisa abanye, angezisindise yena. ³² UKristu, iNkosi yakwa -Israyeli, makehle manje esiphambanweni , ukuze sibone, sikholwe. Nababebethelwe kanye naye bamdumaza. ³³ Sekufikile ihora lesithupha kwaba mnyama emhlabeni wonke, kwaze kwaba yihora lesishiyagalolunye. ³⁴ Ngehora lesishiyagalolunye uJesu wamemeza ngezwi elikhulu , wathi: Eloi, Eloi, lama sabaktani ? okungukuthi ngokuh unyushwa: Nkulunkulu wami , Nkulunkulu wami, ungishiyeleni na? ³⁵ Abanye kwababemi khona bekuzwa bathi: Bheka, ubiza u-Eliya. ³⁶ Wayesegijima omunye, wagcwalisa ilula ngoviniga, walichoma emhlangeni, wamphuzisa, wathi: Yekani, sibone uma u-Eliya eza ukumehlisa. ³⁷ UJesu wayesememeza ngezwi elikhulu, wafa. ³⁸ Khona isihenqo sethempeli sadabuka kabili , kusukela phezulu kuze kufike phansi. ³⁹ Kepha induna yekhulu eyayimi maqondana naye imbona efa ngokunjalo , yathi: Nempela lo muntu ube yiNdodana kaNkulunkulu. ⁴⁰ Kwakukhona nabesifazane bebukela, bekude; phakathi kwabo kwakukhona noMariya Magdalena , noMariya unina kaJakobe omncane nokaJose , kanye noSalome ⁴¹ ababemlandela eseseGalile , bemkhonza, nabanye abesifazane abaningi abenyukela naye eJerusalema. Ukumbelwa kukaJesu (Math. 27:57; Luk. 23:50; Joh. 19:38) ⁴² Kwathi ukuba kuhlwe , ngokuba kwakulusuku lokulungisela okungukuthi olwandulela isabatha, ⁴³ kwafika uJosefa wase -Arimatheya, ilunga elidumileyo lomphakathi , owayewubheka naye umbuso kaNkulunkulu; wangena ngesibindi kuPilatu, wacela isidumbu sikaJesu. ⁴⁴ Kepha uPilatu wamangala ngokuthi ngabe usefile , wabiza induna yekhulu, wabuza kuyo ukuthi sekukade efile na? ⁴⁵ Esezwile enduneni yekhulu wamnika uJosefa isidumbu. ⁴⁶ Wathenga indwangu enhle , wamehlisa, wamsonga ngaleyo ndwangu, wambeka ethuneni elaliqoshwe edwaleni , wagingqela itshe emnyango wethuna. ⁴⁷ OMariya Magdalena noMariya unina kaJose babona lapho abekwa khona.