¹ URaheli esebonile ukuthi wayengamzaleli uJakobe abantwana , uRaheli waba no mhawu ngodadewabo, wathi kuJakobe : Ngiphe abantwana , funa ngife. ² Intukuthelo kaJakobe yayisivuthela uRaheli , wathi: Ngisesikhundleni sikaNkulunkulu okwenqabele isithelo sesizalo na? ³ Wathi: Nansi incekukazi yami uBiliha ; ngena kuye , ukuze azalele emathangeni ami, ngakheke nami ngaye. ⁴ Wayesemupha uBiliha incekukazi yakhe, abe ngumkakhe; uJakobe wangena kuye. ⁵ UBiliha wakhulelwa, wamzalela uJakobe indodana. ⁶ Wayesethi uRaheli : UNkulunkulu ungahlulele , futhi wezwa izwi lami : wangipha indodana, ngalokho waqamba igama layo ngokuthi uDani. ⁷ UBiliha incekukazi kaRaheli wabuye wakhulelwa , wamzalela uJakobe indodana yesibili. ⁸ URaheli wathi : Ngokubambana ngibambene nodadewethu ngamandla kaNkulunkulu, ngamahlula, waqamba igama layo ngokuthi uNafetali. ⁹ ULeya esebonile ukuthi ukhawulile ukuzala , wamthatha uZilipa incekukazi yakhe, wamupha uJakobe, abe ngumkakhe. ¹⁰ UZilipa incekukazi kaLeya wamzalela uJakobe indodana. ¹¹ ULeya wayesethi : Kwenziwe inhlanhla , waqamba igama layo ngokuthi uGadi. ¹² UZilipa incekukazi kaLeya wamzalela indodana yesibili. ¹³ Wayesethi uLeya : Yisibusiso sami ! Ngokuba izintombi ziyakungibiza ngokuthi ngingobusisiweyo, waqamba igama layo ngokuthi u-Asheri. ¹⁴ Ngesikhathi sokuvuna ukolweni uRubeni waya wafumana amamandragora endle, wawayisa kunina uL eya. URaheli wayesethi kuLeya : Ake ungiphe amamandragora endodana yakho. ¹⁵ Wathi kuye : Kuncane yini ukuba uthathile umyeni wami na ? Usuyakuthatha namamandragora endodana yami na ? URaheli wathi : Ngalokho uzakulala nawe ngalobu busuku ngamamandragora endodan a yakho. ¹⁶ Kusihlwa uJakobe esebuya endle , uLeya waya ukumhlangabeza , wathi: Ngena kimi , ngokuba impela ngikuqashile ngamamandragora endodana yami. Wayeselala naye ngalobo busuku. ¹⁷ UNkulunkulu wamuzwa uLeya ; wakhulelwa, wamzalela uJakobe indodana yesihlanu. ¹⁸ Wayesethi uLeya : UNkulunkulu unginikile umvuzo , lokhu ngamnika umyeni wami incekukazi yami, waqamba igama lakhe ngokuthi u-Isakare. ¹⁹ ULeya wabuye wakhulelwa, wamzalela uJakobe indodana yesithupha. ²⁰ Wayesethi uLeya: UNkulunkulu ungiphe isipho esihle ; manje umyeni wami useyakuhlala kimi , ngokuba ngimzalele amadodana ayisithupha , waqamba igama layo ngokuthi uZebuloni. ²¹ Ngasemuva wazala indodakazi, waqamba igama layo ngokuthi uDina. ²² UNkulunkulu wamkhumbula uRaheli , uNkulunkulu wamuzwa , wavula isizalo sakhe. ²³ Wakhulelwa, wazala indodana, wathi: UNkulunkulu ususile ihlazo lami. ²⁴ Waqamba igama layo ngokuthi uJosefa , ethi: UJehova makangenezelele nenye indodana futhi. ²⁵ Kwathi uRaheli esemzalile uJosefa , uJakobe wathi kuLabani : Ngimukise ukuba ngiye endaweni yami ezweni lakithi. ²⁶ Ngiphe omkami nabantwana bami engikusebenzele ngabo , ngihambe, ngokuba uyawazi umsebenzi engikwenzele wona. ²⁷ ULabani wayesethi kuye : Ake ngifumane umusa emehlweni akho . Sengibonile ukuthi uJehova ungibusisile ngenxa yakho. ²⁸ Wathi futhi: Nquma umvuzo wakho, ngikuphe wona. ²⁹ Wathi kuye : Uyazi wena ukuthi ngikukhonze kanjani nokuthi izinkomo zakho zazinjani kimi. ³⁰ Ngokuba kwakukuncane okwakho ngingakafiki ; kepha kwandile , sekukuningi; uJehova ukubusisile ezinyathelweni zami ; manje ngiyakuyisebenzela nini eyami indlu na? ³¹ Wathi: Ngiyakukuphani na ? Wathi uJakobe: Awuyikunginika lutho ; uma ungenzela lokhu, ngiyakubuye ngaluse umhlambi wakho, ngiwulinde. ³² Namuhla ngiyakudabula emhlambini wakho wonke, ngikhiphe khona zonke ezimanakanaka nezimagqabhagqabha , nazo zonke ezimnyama ezimvini , nezimagqabhagqabha nezimanakanaka ezimbuzini, kube ngumvuzo wami. ³³ Ukulunga kwami kuyakungifakazela ngesikhathi esizayo , lapho ufika ngomvuzo wami osebusweni bakho , ukuthi zonke ezingemanakanaka nezingemagqabhagqabha ezimbuzini , nezingemnyama ezimvini ezikimi , mazithiwe zebiwe. ³⁴ Wayesethi uLabani: Bheka, makube njengezwi lakho. ³⁵ Ngalowo muhla wakhipha izimpongo ezinemishwe nezimagqabhagqabha , nezimbuzikazi zonke ezimanakanaka nezimagqabhagqabha , zonke ezinokumhlophe, nezimnyama zonke ezimvini , wazinikela esandleni samadodana akhe. ³⁶ Wamisa ibanga lezinsuku ezintathu phakathi kwakhe noJakobe ; uJakobe walusa imihlambi eseleyo kaLabani. ³⁷ UJakobe wathatha izinti ezimanzi zompopula nezomalimondi nezompelatani, wazebula imishwe emhlophe , wambula okumhlophe okusezintini. ³⁸ Wazifaka izinti abezebulile emikhombeni nasemiqengqeni yamanzi phambi kwemihlambi, lapho imihlambi iza khona ukuphuza ; yamitha ekufikeni kwayo ukuphuza. ³⁹ Imihlambi yamitha phambi kwezin ti, imihlambi yazala ezinemishwe , nezimanakanaka, nezimagqabhagqabha. ⁴⁰ UJakobe wayesahlukanisa amawundlu , wabhekisa ubuso bemihlambi kwezinemishwe nakwezimnyama emhlambini kaLabani ; wabeka amaqembu akhe abe wodwa engawafaki emhlambini kaLabani. ⁴¹ Kwathi l apho ibiyakumitha imihlambi eqinileyo , uJakobe wabeka izinti phambi kwamehlo emihlambi emiqengqeni ukuba imithe phakathi kwezinti. ⁴² Kepha lapho umhlambi wawubuthakathaka , akazifakanga; yathi-ke ebuthakathaka yaba ngekaLabani neqinileyo yaba ngekaJakobe. ⁴³ Yayisikhula kakhulu impela le ndoda , yaba nemihlambi emikhulu, nezincekukazi, nezinceku, namakamela, nezimbongolo.