¹ Wayesethatha uBilidadi umShuhi, wathi: ² Koze kube nini ukhuluma lezi zinto, amazwi akho abe ngumoya onamandla, na? ³ UNkulunkulu uhlanekezela ukwahlulela yini ? USomandla uphendukezela ukulunga na? ⁴ Uma abantwana bakho bonile kuye, yena wabanikela emandleni ezono zabo, ⁵ khona, uma wena ufunisisa uNkulunkulu, unxuse kuye uSomandla, ⁶ uma uhlambulukile , futhi ulungile , khona yena uyakuvuka ngenxa yakho , aphumelelise ikhaya lokulunga kwakho. ⁷ Ukuqala kwakho sekuyakuba ngokuncane , nokugcina kwakho kube ngokukhulu kakhulu. ⁸ Ake ubuze ezizukulwaneni zakuqala , uzibhekise lokho abakuphenyile yo oyise bazo, ⁹ ngokuba thina singabezolo nje , asinalwazi, lokhu imihla yethu emhlabeni iyithunzi; ¹⁰ bona abayikukufundisa yini, bakutshele, bakhiphe amazwi ezinhliziyweni zabo, na? ¹¹ Umhlanga ungahluma lapho kungekho xhaphozi na ? Incema ingamila kungekho manzi na? ¹² Uma iseluhlaza, ingakakhiwa, iyabuna phambi kwabo bonke utshani. ¹³ Zinjalo izindlela zabo bonke abakhohlwa uNkulunkulu : ithemba longenaNkulunkulu liyakuchitheka; ¹⁴ ithemba lakhe liyakunqunywa, nesisekelo sakhe siyindlu yolwembu. ¹⁵ Uyakwencika endlini yakhe , kepha ayiyikuma ; uyakubambelela kuyo , kepha ayiyikuqina. ¹⁶ Yena uluhlaza phambi kwelanga; imixhantela yakhe iyaxhantela ensimini yakhe. ¹⁷ Izimpande zakhe ziyathandela enqwabeni yamatshe , aqhekeze indawo yamatshe. ¹⁸ Uma echithwa endaweni yakhe, iyakumala ngokuthi: Angizange ngikubone. ¹⁹ Bheka, injalo indlela yokuthokoza kwakhe; kuyakuvela abanye othulini. ²⁰ UNkulunkulu akamlahli opheleleyo, kabambi isandla sababi, ²¹ aze agcwalise umlomo wakho ngokuhleka , nezindebe zakho ngokumemeza. ²² Abakuzondayo bayakwembeswa amahloni; itende lababi aliyobe lisabakho.