¹ UJehova wathi kuMose : Khuluma kubapristi , amadodana ka -Aroni, uthi kubo: Makungabikho ozingcolisayo ngofileyo phakathi kwabantu bakubo, ² ngaphandle kwezihlobo ezinyamanye naye , okungukuthi unina , noyise, nendodana yakhe, nendodakazi yakhe, nomfowabo, ³ nodadewabo, intombi eseduze naye, engenandoda; angazingcolisa ngaye. ⁴ Akayikuzingcolisa, eyisikhulu phakathi kwabantu bakubo , ukuze azihlambalaze. ⁵ Abayikuzigega amakhanda abo , bangasiphuculi isilevu emaceleni , bangazigcabi emzimbeni. ⁶ Bayakuba ngcwele kuNkulunkulu wabo , bangahlambalazi igama likaNkulunkulu wabo , ngokuba banikela ngeminikelo yomlilo kaJehova , isinkwa sikaNkulunkulu wabo; ngalokho bayakuba ngcwele. ⁷ Angathathi ow esifazane oyisifebe nowonakeleyo , angathathi owesifazane olahliwe yindoda yakhe, ngokuba ungcwele kuNkulunkulu wakhe. ⁸ Ngalokho uyakumngcwelisa , ngokuba unikela ngesinkwa sikaNkulunkulu wakho; uyakuba ngcwele kuwe , ngokuba mina Jehova oningcwelisayo ngingcwele. ⁹ Indodakazi yompristi, uma izingcolisa ngokufeba , iyamhlambalaza noyise; yoshiswa ngomlilo. ¹⁰ Ongumpristi omkhulu phakathi kwabafowabo , kuthelwe ekhanda lakhe amafutha okugcoba , nowahlukaniselwa ukuba embathe izambatho, akayikuthukulula izinwele zekhanda lakhe, angaklebhuli izambatho zakhe, ¹¹ angangeni nakumuphi umuntu ofileyo , angazingcolisi ngoyise noma ngonina, ¹² futhi angaphumi endlini engcwele , angahlambalazi indlu engcwele kaNkulunkulu wakhe; ngokuba umqhele wamafutha okugcoba kaNkulunkulu wakhe uphezu kwakhe; nginguJehova. ¹³ Wothatha umfazi oseyintombi. ¹⁴ Umfelokazi noma umfazi olahliweyo noma owesifazane owonakelyo , isifebe, laba akayikubathatha , kepha uyakuthatha intombi yabantu bakubo ibe ngumkakhe. ¹⁵ Akayikuhlambalaza inzalo yakhe phakathi kwabantu bakhe ; ngokuba nginguJehova oningcwelisayo. ¹⁶ UJehova wakhuluma kuMose, wathi: ¹⁷ Yisho ku -Aroni, uthi: U muntu wenzalo yakho ezizukulwaneni zayo oyisilima makangasondeli ukunikela ngesinkwa sikaNkulunkulu wakhe. ¹⁸ Ngokuba umuntu oyisilima akayikusondela : impumputhe noma unyonga , noma onekhala eliyisicaba, noma ozitho zakhe zingalingene, ¹⁹ noma umuntu ononyawo olwaphukileyo, noma onesandla esaphukileyo, ²⁰ noma onesifumbu, noma oyisichwe, noma onomlanga esweni lakhe , noma onesithembuzane, noma onomuna, noma oyisilima ngamasende; ²¹ akungabikho muntu wenzalo ka -Aroni umpristi oyisilima oyakusondela ukunikela ngeminikelo yomlilo kaJehova ; uyisilima; makangasondeli ukunikela ngesinkwa sikaNkulunkulu wakhe. ²² Uyakudla isinkwa sikaNkulunkulu wakhe, esingcwelengcwele nesingcwele. ²³ Kuphela akayikungena kuso isihenqo , futhi angasondeli e -altare, ngokuba uyisilima, ukuze angahlambalazi izindlu zami ezingcwele , ngokuba nginguJehova obangcwelisayo. ²⁴ UMose wakhuluma lokho ku -Aroni, nakumadodana akhe , nakubo bonke abantwana bakwa-Israyeli.