¹ UJehova wakhuluma kuMose, wathi: ² Thuma wena abantu ukuba bahlole izwe laseKhanani engibanika lona abantwana bakwa -Israyeli; uthume umuntu waleso naleso sizwe sawoyise , kube yilowo nalowo abe yinduna phakathi kwabo. ³ UMose wabathuma-ke besuka ehlane lasePharanu ngesiyalezo sikaJehova ; bonke babo babe ngabantu abayizinhloko zabantwana bakwa-Israyeli. ⁴ Lawa angamagama abo : Owesizwe sakwaRubeni : uShamuwa indodana kaZakuri. ⁵ Owesizwe sakwaSimeyoni: uShafati indodana kaHori. ⁶ Owesizwe sakwaJuda: uKalebi indodana kaJefune. ⁷ Owesizwe sakwa-Isakare: u-Igali indodana kaJosefa. ⁸ Owesizwe sakwa-Efrayimi: uHosheya indodana kaNuni. ⁹ Owesizwe sakwaBenjamini: uPaliti indodana kaRafu. ¹⁰ Owesizwe sakwaZebuloni: uGadiyeli indodana kaSodi. ¹¹ Owesizwe sakwaJosefa, owesizwe sakwaManase: uGadi indodana kaSusi. ¹² Owesizwe sakwaDani: u-Amiyeli indodana kaGemali. ¹³ Owesizwe sakwa-Asheri: uSethuru indodana kaMikayeli. ¹⁴ Owesizwe sakwaNafetali: uNabi indodana kaVofisi. ¹⁵ Owesizwe sakwaGadi: uGewuweli indodana kaMaki. ¹⁶ Yilawo amagama amadoda athunywa nguMose ukuhlola izwe . UMose wambiza uHosheya indodana kaNuni ngokuthi uJoshuwa. ¹⁷ UMose wabathuma ukuhlola izwe laseKhanani , wathi kubo : Yenyukani ngalapha, niye ngaseningizimu, nikhuphukele ezintabeni, ¹⁸ nibone izwe ukuthi linjani , nabantu abakhe kulo ukuthi banamandla noma babuthakathaka, bayingcosana noma baningi yini, ¹⁹ nokuthi izwe abakhe kulo linjani , noma lihle noma libi , nokuthi imizi abahlala kuyo injani, noma ngamakamu noma yizinqaba, ²⁰ nokuthi izwe linjani, noma livundile noma limpofu, noma linezinkuni noma qha. Yibani nesibindi, nibuye nezithelo zezwe . Kwase kuyisikhathi sezithelo zokuqala zomvini. ²¹ Base behamba -ke, bahlola izwe kusukela ehlane laseSini kuze kube seRehobe ekuyeni ngaseHamati. ²² Benyukela ngaseningizimu , bafika eHebroni ; o-Ahimani, noSheshayi, noTalimayi, abantwana bakwa-Anaki, babelapho. IHebroni lakhiwa iminyaka eyisikhombisa lingakakhiwa iSowani laseGibithe. ²³ Bafika esiGodini sase -Eshikoli, banquma khona igatsha elinehlukuzo lezithelo zomvini , balithwala ngothi phakathi kwababili , kanye namapomegranati namakhiwane. ²⁴ Leyo ndawo yathiwa isiGodi sase -Eshikoli ngenxa yehlukuzo abantwana bakwa-Israyeli abalinquma khona. ²⁵ Base bebuya ekuhloleni iz we ngasekupheleni kwezinsuku ezingamashumi amane. ²⁶ Baya bafika kuMose naku -Aroni nakuyo yonke inhlangano yabantwana bakwa-Israyeli ehlane lasePharanu eKadeshi , babuyisela izwi kubo nakuyo yonke inhlangano, bababonisa izithelo zezwe. ²⁷ Bamtshela bathi: Safika-ke ezweni owasithuma kulo; ngempela livame ubisi nezinyosi; lokhu kuyizithelo zalo. ²⁸ Nokho abantu abakhe ezweni banamandla , imizi ibiyelwe , mikhulu kakhulu; futhi sabona abantwana bakwa-Anaki khona. ²⁹ U-Amaleki wakhile ezweni laseningizimu; amaHeti, namaJebusi, nama- Amori ahlala ezintabeni ; amaKhanani akhile ngaselwandle naseceleni kweJordani. ³⁰ UKalebi wathulisa abantu phambi kukaMose , wathi: Masenyuke khona manje, silidle, ngokuba sinamandla okulinqoba. ³¹ Kepha amadoda ayenyuke naye athi: Asinakwenyuka, sihlasele labo bantu, ngokuba banamandla kunathi. ³² Base belandisa abantwana bakwa -Israyeli umbiko omubi ngezwe ababelihlolile, bathi: Izwe esilidabulile ukulihlola liyizwe elidla abakhileyo kulo; bonke abantu esababona kulo bangabantu abajaheleyo. ³³ Sabona khona iziqhwaga , amadodana ka -Anaki ayela eziqhwageni ; emehlweni ethu saba njengezintethe, saba njalo nasemehlweni abo.