¹ UNawomi uninazala wathi kuye : Ndodakazi yami , angiyikukufunela ukuphumula ukuba kube kuhle kuwe na? ² Angithi uBowazi owawunamantombazana akhe uyisihlobo sethu na ? Bheka, uyela ibhali kusihlwa esibuyeni. ³ Ngakho-ke geza, ugcobe, ugqoke isambatho sakho, wehlele esibuyeni, kepha ungazazisi kulowo muntu, aze aqede ukudla nokuphuza. ⁴ Kuyakuthi nxa eselala , uqaphele indawo ayakulala kuyo , ungene, wambule izinyawo zakhe, ulale; uyakukutshela lokhu oyakukwenza. ⁵ Wathi kuye: Konke okushoyo ngiyakukwenza. ⁶ Wehlela esibuyeni, wenza njengakho konke amyale ngakho uninazala. ⁷ UBowazi wadla waphuza , inhliziyo yakhe yathokoza , waya ukulala ngasekugcineni kwenqwaba yamabele ; wafika kahle , wambula izinyawo zakhe, walala. ⁸ Kwathi phakathi kwamabili yethuka leyo ndoda , yaphenduka; bheka, kwakulele owesifazane ngasezinyaweni zayo. ⁹ Yathi: Ungubani? Wathi: NginguRuthe incekukazi yakho ; yembesa incekukazi yakho umphetho wengubo yakho, ngokuba ungumhlengi. ¹⁰ Yathi: Mawubusiswe nguJehova , ndodakazi yami ; ubonakalisile umusa ekugcineni kakhulu kunasekuqaleni, ngokuba awulandelanga izinsizwa , noma zimpofu noma zicebile. ¹¹ Manje, ndodakazi yami , ungesabi; ngiyakukwenzela konke okushoyo , ngokuba wonke umuzi wabantu bakithi uyazi ukuthi ungowesifazane olungileyo. ¹² Yebo, kuqinisile ukuthi ngingumhlengi, kepha kukhona umhlengi omkhulu kunami. ¹³ Hlala lobu busuku ; kuyakuthi ekuseni , uma ekuhlenga , kulungile, makakuhlenge; kepha uma engathandi ukukuhlenga , mina ngiyakukuhlenga, kuphila kukaJehova; lala kuze kuse. ¹⁴ Walala ngasezinyaweni zakhe kwaze kwasa, wavuka bengakazani. Ngokuba yathi: Makungaziwa ukuthi owesifazane wafika esibuyeni. ¹⁵ Yayisithi: Letha ingubo ephezu kwakho, uyibambe. Wayibamba, yalinganisa kasithupha ibhali, yamthwesa lona, wangena emzini. ¹⁶ Wafika kuninazala ; wathi yena : Ungubani, ndodakazi yami ? Wamtshela konke leyo ndoda ebimenzele khona. ¹⁷ Wathi: Ingiphile lezi zilinganiso eziyisithupha zebhali , ngokuba yathi kimi: Ungayi kunyokozala ungaphethe lutho. ¹⁸ Wathi: Hlala, ndodakazi yami, uze wazi ukuba le ndaba iyakuphethelaphi , ngokuba leyo ndoda ayiyikuphumula ingakaqedi indaba namuhla.