¹ UJehova wathi kuNowa : Ngena emkhunjini , wena nendlu yakho yonke , ngokuba ngikubonile wena ukuthi uqotho phambi kwami kulesi sizukulwane. ² Kuzo zonke izilwane ezihlambulukileyo uzakuthatha ngasikhombisa, iduna nensikazi yalo, nakuzo izilwane ezingahlambulukile uthathe ngambili , iduna nensikazi yalo, ³ nakuzo izinyoni zezulu ngasikhombisa , iduna nensikazi , ukuba kulondolozwe inzalo emhlabeni wonke. ⁴ Ngokuba emva kwezinsuku eziyisikhombisa ngiyakunisa imvula emhlabeni izinsuku ezingamashumi amane nobusuku obungamashumi amane , ngichithe ebusweni bomhlaba konke okuphilayo engikwenzileyo. ⁵ UNowa wakwenza konke njengalokho emyalile uJehova. ⁶ UNowa wayeneminyaka engamakhulu ayisithupha mhla uzamcolo wamanzi efika emhlabeni. ⁷ UNowa wangena emkhunjini namadodana akhe , nomkakhe, nabafazi bamadodana akhe bekanye naye ngenxa yamanzi kazamcolo. ⁸ Kuzo izilwane ezihlambulukileyo nezingahlambulukile , nezinyoni, nezilwanyana ezinwabuzelayo emhlabeni ⁹ kwangena ngambili emkhunjini kuNowa , iduna nensikazi , njengalokho uNkulunkulu emyalile uNowa. ¹⁰ Kwathi emva kwezinsuku eziyisikhombisa amanzi kazamcolo afika emhlabeni; ¹¹ ngomnyaka wamakhulu ayisithupha wokuhamba kuka Nowa ngenyanga yesibili ngosuku lweshumi nesikhombisa lwenyanga , ngalona lolo suku imithombo yonke yotwa yabhoboka, namafasitele asezulwini avuleka. ¹² Lana emhlabeni izinsuku ezingamashumi amane nobusuku obungamashumi amane. ¹³ Ngalolo suku uNowa wangena em khunjini noShemi , noHamu, noJafete, amadodana kaNowa , nomkaNowa, nabafazi bobathathu bamadodana akhe bekanye nabo, ¹⁴ bona nazo zonke izilwane ngezinhlobo zazo , nezinkomo zonke ngezinhlobo zazo, nezilwanyana zonke ezinwabuzelayo emhlabeni ngezinhlobo zazo , nezinyoni zonke ngezinhlobo zazo, konke okunamaphiko. ¹⁵ Zangena kuNowa emkhunjini zimbili ngazimbili enyameni yonke okukuyo umoya wokuphila. ¹⁶ Ezangenayo zangena ziyiduna nensikazi zenyama yonke , njengalokho uNkulunkulu emyalile; uJehova wavala emva kwakhe. ¹⁷ Kwaba nguzamcolo emhlabeni izinsuku ezingamashumi amane ; amanzi anda, aphakamisa umkhumbi; waphakama phezu komhlaba. ¹⁸ Amanzi akhula , anda kakhulu emhlabeni ; umkhumbi wahamba ebusweni bamanzi. ¹⁹ Amanzi andisisa impela emhlabeni ; zasitshekelwa zonke izi ntaba eziphakemeyo eziphansi kwezulu lonke. ²⁰ Amanzi azidlula ngezingalo eziyishumi nanhlanu , zaze zasitshekelwa izintaba. ²¹ Inyama yonke eyayihamba emhlabeni yafa , izinyoni, nezinkomo, nezilo, nezilwanyana ezinwabuzelayo emhlabeni, nabantu bonke; ²² konke okunomphefumulo womoya wokuphila emakhaleni akho , konke okusemhlabathini owomileyo, kwafa. ²³ Wachitha kanjalo konke okuphilayo ebusweni bomhlaba , abantu, nezinkomo, nezilwanyana ezinwabuzelayo , nezinyoni zezulu ; wakuchitha emhlabeni; kwasala uNowa yedwa ka nye nakho okwakukhona naye emkhunjini. ²⁴ Amanzi ayenamandla emhlabeni izinsuku eziyikhulu namashumi ayisihlanu.